ரஜினியின் இமயமலை பயணம் கேன்சல்

சூப்பர் ஸ்டார் ரஜினிகாந்தின் இமயமலை பயணம் திடீரென ரத்து செய்யப்பட்டுள்ளது. அவரது மகள் சவுந்தர்யாவுக்காக ரஜினிகாந்த் இந்த திடீர் முடிவை எடுத்துள்ளார். சிவாஜி படத்தின் பிரமாண்ட வெற்றிக்கு பிறகு சூப்பர் ஸ்டார் ரஜினிகாந்த் நடித்து வரும் படம் குசேலன். இந்த படத்தின் இறுதிகட்ட சூட்டிங் நடந்து வருகிறது. ரஜினி சம்பந்தப்பட்ட காட்சிகள் அனைத்தும் எடுக்கப்பட்டாலும், கடைசி நேரத்தில் சில காட்சிகளை சேர்க்க வேண்டியிருப்பதால் குசேலன் பணிகளை ரஜினிகாந்த் உன்னிப்பாக கவனித்து வருகிறார். குசேலன் சூட்டிங்கை முடித்துக்கொண்டு ரஜினிகாந்த் இமயமலை செல்லப்போகிறார் என்ற தகவல்கள் வெளியாயின. இதனை ரஜினிகாத்த் அலுவலக வட்டார தகவல்களும் உறுதி செய்தன. இந்நிலையில், சுல்தான் தி வாரியர் படத்திற்காக ரஜினிகாந்த்தை மேலும் சில காட்சிகளில் நடித்து கொடுக்குமாறு மகள் சவுந்தர்யா கேட்டுக் கொண்டார். இதையடுத்து தனது இமயமலை பயணத்தை தற்காலிகமாக கேன்சல் செய்துள்ளார் ரஜினிகாந்த்.

அடுத்த சில நாட்களில் சுல்தான் தி வாரியர் படத்தின் சூட்டிங்கிற்காக மகள் சவுந்தர்யா மற்றும் குழுவினருடன் வியட்நாம் செல்லும் ரஜினிகாந்த், பின்னர் அங்கிருந்து நேராக டில்லி வந்து இமயமலை செல்லவிருப்பதாக தகவல்கள் வெளியாகியுள்ளன. இமயமலை ஆன்மீக பயணத்தை முடித்துக் கொண்டு கேரளா வந்து ஆயுர்வேத மசாஜ் செய்து கொள்கிறாராம். அதன் பின்னர் புதுப்பொலிவுடன் ரோபோ படத்தில் நடிக்கத் தொடங்குவார் என்று ரஜினி அலுவலக வட்டார தகவல்கள் தெரிவிக்கின்றன.