தசாவதாரத்தை மிஞ்சும் ரோபோ பிரமாண்டம்

சூப்பர் ஸ்டார் ரஜினிகாந்த் அடுத்து நடிக்கவுள்ள ரோபோ படத்தின் பூஜையை, தசாவதாரம் ஆடியோ வெளியீட்டு விழாவை விட பிரமாண்டமாக நடத்த திட்டமிட்டுள்ளார் டைரக்டர் ஷங்கர்.

பிரமாண்ட இயக்குனர் என்று பெயரெடுத்த டைரக்டர் ஷங்கரும், சூப்பர் ஸ்டார் ரஜினிகாந்தும் இணையும் அடுத்த படம் ரோபோ. இந்த படத்தை ஐங்காரன் இன்டர்நேஷனல் மற்றும் ஈரோஸ் மல்டிமீடியா நிறுவனமும் இணைந்து தயாரிக்கின்றன. சிவாஜி படத்தை விட பிரமாண்டமாக உருவாக இருக்கும் ரோபோவின் கதை‌, தொழில்நுட்பம், கிராபிக்ஸ் என அனைத்துமே தமிழ் ரசிகர்களுக்கு புதுமையாக இருக்குமாம். படத்தில் ரஜினிக்கு ஜோடியாக நடிப்பவர் முன்னாள் உலக அழகியும், பிரபல பாலிவுட் நடிகையுமான ஐஸ்வர்யா ராய்தான்.
ரோபோவை தனது லட்சிய படம் என்று சொல்லும் டைரக்டர் ஷங்கர், தற்போது ரோபோ படத்துக்கான பூஜையை பிரமாண்டமாக நடத்த முடிவு செய்திருக்கிறாராம். ரோபோ பட பூஜையில் பாலிவுட் சூப்பர் ஸ்டார் அமிதாப் பச்சன், தெலுங்கு சூப்பர் ஸ்டார் சிரஞ்சிவி, மலையாள சூப்பர் ஸ்டார் மம்முட்டி, பாலிவுட் புகழ் ஐஸ்வர்யாராய் உள்ளிட்டோரை பங்கேற்க வைக்க திட்டமிட்டு வருகிறார்கள். சூப்பர் ஸ்டாரின் படம் என்பதால் முன்னணி நட்சத்திரங்கள் யாரும் மறுப்பு சொல்லாமல் விழாவில் பங்கேற்பார்கள் என்று ரோபோ குழுவினர் நம்புகிறார்கள்.

சரி... படத்தின் பூஜை எப்போது? ரோபோவை தயாரிக்கும் நிறுவனங்களில் ஒன்றான ஐங்காரன் நிறுவனத்தை தொடர்பு கொண்டு கேட்‌டோம். ஐங்காரன் நிர்வாகி ஒருவர் கூறுகையில், ஷங்கர் சார் இப்போதுதான் கதை டிஸ்கஷனை முடித்திருக்கிறார். சூட்டிங் லொகேஷனையும் ‌தேர்ந்தெடுத்து விட்டோம். ரஜினி சார் குசேலன் சூட்டிங்கை இப்போதுதான் முடித்திருக்கிறார். அவர் இமயமலைக்கு செல்லவிருக்கிறார் என்று கேள்விப்பட்டோம். அவர் இமயமலை சென்று திரும்பியதும் தேதி முடிவு செய்யப்படும். விரைவில் ரோபோ படத்தின் பூஜைக்கான தேதி அறிவிக்கப்படும். ரோபோ பூஜை‌யை உலக திரையுலகம் இதுவரை காணாத வகையில் பிரமாண்டமாக நடத்த வேண்டும் என்று ஷங்கர் சார் விரும்புகிறார். ரஜினி சாரிடம் இதுவரை அதுகுறித்து பேசவில்லை என்று ஷங்கர் சார் சொன்னார். இதுபற்றிய அறிவிப்பும் விரைவில் வெளிவரும், என்றார்.

(நிருபர் வலைப்பூவில் இடம்பெறும் செய்திகள் குறித்த உங்களது மேலான கருத்துக்களையும் பதிவிடுங்கள் வாசகர்களே...!)