சைக்கோ மனிதனின் திகில் கதை படமாகிறது

ஏதாவது ஒரு பரபரப்பான சம்பவம் நடந்தால் அந்த சம்பவத்தை கதைக்கருவாக வைத்து படமெடுப்பதில் தமிழ்சினிமாக்காரர்களை மிஞ்சவே முடியாது என்பதற்கு இன்னொரு உதாரணம் கிடைத்து விட்டது.

சென்னை நகரை கடந்த சில நாட்களாக மர்ம நகராக மாற்றியிருக்கும் சைக்கோ மனிதனின் கதையை திரைப்படமாக எடுக்க ரங்கீலா என்டர்பிரைசஸ் நிறுவனம் முடிவு செய்துள்ளது. இதற்கான கதை விவாதம் தற்போது நடந்து வருகிறது. ஆக்ரா என்ற கிளுகிளுப்பான படத்தை இயக்கிய டைரக்டர் பி.சித்திரை செல்வன்தான் சைக்கோ படத்தையும் இயக்கவுள்ளார். பாலு என்பவர் திரைக்கதை வசனம் எழுதுகிறார். சைக்கோ என்ற வார்த்தைக்கான தமிழ் வார்த்தையை தேடிக் கொண்டிருக்கிறார்கள். விரைவில் இப்புதிய படத்துக்கான அறிவிப்புகள் வெளியிடப்படும். அடுத்த மாதத்துக்குள் சூட்டிங் தொடங்கப்படும் என்று ரங்கீலா என்டர்பிரைசஸ் நிறுவனம் தெரிவித்துள்ளது.

இப்புதிய படத்தை தத்ரூபமாக எடுக்க வேண்டும் என்பதற்காக சென்னை நகரில் தற்போது நடந்து வரும் மர்மங்களையும் இரவு நேரங்களில் சென்று பார்வையிட்டு வருகிறாராம் டைரக்டர் சித்திரை செல்வன். (பார்த்து சார்... எதையாவது உத்து பார்த்தால் சைக்கோன்னு நெனச்சு பொதுமக்கள் அடிச்சி போட்டுடுராங்களாம். போலீசும் அத கை கட்டி நின்னு வேடிக்கை பார்க்கிறாங்க.)