10 ஆயிரம் பேர் : இது சாதனையா?

நிருபர் வலைப்பூவில் தமிழ் சினிமா தொடர்பான செய்திகளை ரெகுலராக கொடுக்க தொடங்கி இன்றோடு 81 நாட்கள் ஆகின்றன. இந்த 81 நாட்களில் மொத்தம் 172 பதிவுகள் எழுதப்பட்டுள்ளன.

2008ம் ஆண்டு ஏப்ரல் மாதம் 29ம் தேதி இந்திய நேரப்படி மதியம் 12.15 மணிக்கு, //தமிழ் சினிமா ரசிகர்களுக்காக, சினிமா செய்திகளை உடனுக்குடன் சுடச்சுட தரும் முயற்சியில் இந்த வலைதளத்தை ஆரம்பித்திருக்கிறேன். அடிக்கடி வந்து என்னை ஊக்குவிப்பீர்கள் என்று நம்புகிறேன்// என்ற முதல் பதிவுடன் எனது பதிவுலக வாழ்க்கை தொடங்கியது.

தினமும் நேரம் பாராமல் வேலையினிடையே கிடைக்கும் நேரத்தில் எல்லாம் எனக்கு கிடைக்கும் செய்திகளை வாசகர்களுக்கு கொடுத்து வருகிறேன். இது எனது 172வது பதிவு. எனது வலைப்பூவில் எழுதப்படும் செய்திகளை வந்து படித்த வாசகர்களின் எண்ணிக்கே நேற்று இரவோடு 10 ஆயிரத்தை தொட்டு விட்டது. இந்த 10 ஆயிரத்துக்கும் மேற்பட்ட வாசகர்கள் எனது எழுத்துக்கள் அடங்கிய பக்கங்களை 39 ஆயிரத்து 400 முறை பார்த்து, படித்து சென்றிருக்கிறார்கள்.

ஒரு பத்திரிகை நிருபராக நான் எழுதும் செய்திகளை எத்தனையோ லட்சம் வாசகர்கள் படித்திருக்கிறார்கள். பிரபலமான பத்திரிகை என்பதால் எனது எழுத்துக்கள் எளிதில் வாசகர்களை சென்றடைகின்றன. ஆனால் பிரபலம் இல்லாத ஒரு பெயரில் நான் தொடங்கிய இந்த நிருபர் வலைப்பூவை இவ்வளவு குறுகிய காலத்தில் இத்தனை பேர்கள் வந்து நுகர்ந்து சென்றது ஒரு பெரிய சாதனையாகவே எனக்கு தோன்றுகிறது. எனது இந்த எண்ணம் சரியா? என்பதை எனது வாசகர்களாகிய நீங்கள்தான் தெரிவிக்க வேண்டும்.

2007ம் ஆண்டு தொடக்கத்திலேயே நிருபர் என்ற பெயரில் வலைப்பூவை தொடங்கிய நான் அதற்கு பிறகு செய்திகளை முறையாக பதிவேற்றம் செய்யவில்லை. காரணம் வாசகர்கள் எவரும் எனது வலைப்பூவை நுகர வராததுதான். தமிழ்மணம், திரட்டி, தமிழ்கணிமை போன்ற திரட்டிகளைப் பற்றி அறிந்திருந்தும் அதில் எப்படி பதிவை இணைப்பது என்று தெரியாமல் இருந்தேன். (இன்றுவரை தேன்கூடு திரட்டியில் எனது பதிவை இணைக்க முடியவில்லை என்பது வேறு கதை) அந்த நேரத்தில் எனக்கு அறிமுகமாகிய நெல்லைதமிழ் டாட் காம் இணையதளத்தின் ஆசிரியர் நண்பர் மோகன்ராஜ் அவர்கள்தான் தமிழ்மணத்தில் இணைப்பது பற்றியும், அதனால் வரும் வாசகர்கள் பற்றியும் தெரிவித்து, தமிழ்மணத்தில் இணைக்க உதவினார். அவருக்கு இத்தருணத்தில் நன்றிகூற கடமைப்பட்டிருக்கிறேன்.

அடுத்து வலைப்பதிவு உலகில் எனக்கு அறிமுகமாகிய முதல் நண்பர் ஒருவரைப் பற்றி சொல்லியே ஆக வேண்டும். அவர் கிரி. முதன் முதலாக எனக்கு பின்னூட்டம் அனுப்பியதுடன், என்னை ஊக்கப்படுத்தியதில் ஊக்கப்படுத்துவதில் அவரது பங்கு அதிகமாகவே இருக்கிறது என்று சொல்லிக் கொள்ள ஆசைப்படுகிறேன்.

அதேநேரத்தில் முரளிகண்ணன், அதிஷா, கீ&வென், மனதின் ஓசை, லேகா, மங்களூர் சிவா, டொன்லீ, ராப், கானா பிரபா, ச்சின்னபையன், பாண்டி பரணி, பினாத்தல் சுரேஷ் போன்ற பல வலைப்பதிவர்கள் (யாருடைய பெயராவது விடுபட்டிருந்தால் என்னை மன்னித்து விடுங்கள்) மற்றும் பெயரிடாத வாசகர்கள் எனது பதிவுக்கு வந்து பின்னூட்டமிட்டு என்னை ஊக்குவித்து வருகிறார்கள். என்னை ஊக்கப்படுத்தும் அனைவருக்கும் நன்றியை தெரிவித்துக் கொள்கிறேன்.

சினிமா நிருபரின் இந்த பயணம் வெற்றிப்பயணமா அல்லது வெற்றுப் பயணமா? என்பதை பின்னூட்டமாக தெரிவியுங்கள் வாசகர்களே...! மேலும் நிருபரிடம் இருந்து நீங்கள் எதிர்பார்க்கும் வேறு விஷயங்கள் இருந்தாலும் பின்னூட்டமிடுங்கள். உங்கள் கருத்து எமது வளர்ச்சிக்கு படிக்கல்லாக இருக்கும் என்பதை தெரிவித்துக் கொண்டு, மீண்டும் ஒருமுறை வாசகர்கள் அனைவருக்கும் நன்றியினை தெரிவித்துக் கொள்கிறேன்.

இந்த 81 நாட்களில் எனக்கு பின்னூட்டமாகவும், தனி மடலிலும் வந்த பாராட்டுக்களையெல்லாம் தொகுத்து ஒரு பதிவாக போட ஆசைப்படுகிறேன். நேரமின்மை காரணமாக இத்தோடு நிறுத்திக் கொள்கிறேன்.